第一次見主診肥醫生

2008年1月9日星期三 (留醫第2天)
瞓o左成日, 都係冇醫生o黎睇我, 問實習醫生我幾時出得院, 佢話我好似燒傷咁,仲想出院呀~   我都冇聲出 . 佢話要等皮膚科醫生o黎至可以比藥我食. 我問佢醫生幾時o黎, 佢都唔知, 跟住係我面前打比醫生辦工室, 好似護士話皮膚科醫生個個file都攞,淨係冇攞我個個, 唔係呀嘛?? 攞剩我個file??
等到下午都冇人o黎, 只係有姑娘同我量血壓, 探下熱. 當其時對政府醫院都有d失望.不愧為政府醫院, 入o黎2日都冇醫生睇我, 但見佢地個個都好忙. 唔對路醒起尋日私家專科葉醫生吩咐我, 叫我3,4點打比佢. 講下我咩環境. 咁我又check過公司醫療都cover到. 就想轉去私家醫院.
唉~點知打比葉醫生, 話佢知我想轉私家, 佢居然話: 冇人牛皮癬入私家喎~咁即係點? 唔理我呀? 哦一聲, 我就收線. 講多無謂.
實習醫生再同我直接打比皮膚科醫生. 聽佢依依哦哦.問佢o黎唔o黎, 答案係唔o黎,因為好忙,好似話要開會...................又要等明天.
點知晚上9:30左右, 皮膚科醫生突然殺到o黎,佢話飯都未食就趕o黎睇我,醫生睇我兩睇, 話要割我少少皮去化驗係咪牛皮癬.不過睇個樣都係o架啦.仲講2種醫法(食藥方法) 有一種話要放支o野落個肝度,每半年攞番出o黎驗下.未聽清楚已經想暈, 第一次留醫, 第一次割皮.............仲話插支o野落個肝到.............
個醫生都唔算嚴肅,肥肥地.四眼o既. 講o野好鬼大聲. 佢問我即刻割皮定係聽日.我話即刻啦, 佢又話等我聽日覆. 吹漲. 我驚佢聽日又唔知幾點至o黎.
醫生係我個檔案度寫o左好多o野, 又寫o左張藥方. 差不多有成10種,止痕藥呀,類固醇藥膏都有幾種,原來又要分搽面, 搽身又唔同.搽身又有輕類固醇,中類固醇,洗頭水又有, 保濕膏又有. 林林種種.可能聽日有得開始食藥.