比醫生割o左少少皮~ _

2008年1月10日星期四 (留醫第3日)
12點幾, 醫生o黎割我少少皮走,縫o左3針.
肥醫生舖張o野落床,我隻左手放上去.再放塊布遮住我睇唔到佢割我d皮,搽d麻醉藥,割落o黎第一刀, 肥醫生一邊割一邊同我講, 嗱, 呢一下係最痛o既. 佢真係冇呃我, 真係最痛個一刀(其實有麻醉藥,根本唔覺得痛,但感覺都幾恐怖),後尾佢同我縫針,我都唔覺, 仲以為佢同我貼緊膠布.
Biopsy報告要6個星期至出o黎
24號拆線
下午搬o左我去A8 38號床.
原來係醫院o既病人, 就算你行得都好. 佢都會用架輪椅推你去目的地.我只係皮膚有事,所以實在唔係好意思比人推住架車行,而唔洗自己行.
3點幾到A8 38號床~ 正!2個人一間房, 之前係E5, 夜晚D護士/亞嬸/病人, 實在嘈到瞓唔到.稍後有一個64歲婆婆o黎瞓係我隔離. 都好好傾.
隻腳生o左好多牛皮癬,條頸都有.奇怪!點解一路食住藥都會生牛皮癬...........
手開始甩皮....                                                                                                           
呢幾晚都係有微燒.
夜晚瞓瞓下就會比d姑娘叫醒量血壓&探熱. 次次都驚會變高燒.....