出院啦~ 留醫24日 ~暫別膿皰型牛皮癬

2008年1月31日星期四 (留醫第２４日）　出院～
醫生巡房話可以星期五至出院, 我話比醫生知:我已經公告天下今日出院,佢有d不滿話:我唔係話你知,要睇o左報告先決定出院咩??? 咁我問佢:咁個報告有冇問題??醫生就話報告冇問題.雖然佢唔想我出院, 但無奈都要比我出院.
留o左24日終於可以出院了.~第一次牛皮癬病發,第一次留醫,一次做切皮化驗,第一次縫針,好多好多o既第一次. 整體上政府醫院o既服務完全比想像中好. 姑娘醫生都好好. 當然有d姑娘真係麻麻. 但基本上完全可以接受.多謝QE~~多謝肥醫生~~多謝亞媽每日o既湯水．
冇肥醫生o既少食多餐指導搽藥膏, 我真係唔多識搽藥膏&　aqueous cream,慶幸遇到個好醫生，對個病真係事半功倍．
　佢成日問病人明唔明白,希望佢真係攞個心o黎問病人明唔明, 因為病人無論對自己個病, 食緊o既藥都係一無所知.好多時真係好想問下醫生.
拜拜啦~~~~~
2月4號到油麻地覆診

後記：
牛皮癬唔會傳染人~
牛皮癬唔會斷尾．只可以控制住．上網查資料．
基本西藥只係抑制皮膚表面嘅生長速度．
停藥１個月至個半月，ｄ牛皮癬就會生番出ｏ黎，
嚴重程度視乎病者嘅情緒呀，等等．
重有，１０個牛皮癬患者之中，有約１０％～３０％會在若干
年後，同時患上牛皮癬關節炎．

犧牲我~~~~??

2008年1月30日星期三 (留醫第23日)
9:20分 比上星期遲o左成個鐘至o黎,醫生話個病人急病,所以要犧牲下我喎,冇所謂啦,橫掂我都咁穩定,醫生叫我下星期一覆診喎,收到.     唔知係咪下午呢? 要請定假.
聽日出院好多o野做, 唔知可唔可以同醫生影到相,送到禮物,攞到醫生紙.今日話咁快就唔見o左醫生. 緊係趕住去油麻地啦

明天要做: (1)病假紙 (2)送禮 (3)影相(4)覆診時間


      .

急病牛皮癬病人,需要我張床~

2008年1月29日星期二 (留醫第22日)
就o黎可以出院, 有機會就問下醫生d藥o既副作用.今日10:05分準時巡房
黃色chlorpheniramine maleate (piriton)4mg-止痕,冇乜副作用.
藍色promethazine hcl (phenergan)25mg-止痕
neotigason-令膽固醇高.對個肝都有影響,冇膽固醇咁勁.唔會食肥人.一定唔可以有bb,停藥2~3年至可以生bb, 噢~到時我咁老, 唔洗生咯~ >_<
藥膏會水腫.
問唔晒呀~ 自己上網再查啦.
今日睇完本"在天堂遇見的五個人",已經睇o左第2次啦~ 送o左比肥醫生睇. 佢問我睇完啦? 睇完還番比我喎. 
都唔洗啦.書係比人睇o既. 淨放係書架上o既就失去書o既價值啦.
 無無聊聊係出面睇下書, 寫下紙仔咁, 寫完入去瞓,2:00左右,醫生拍醒我,因為有個急病o既病人需要床,所以醫生問我星期四出院好唔好喎, (本來話星期日)緊係好啦,出院前再抽多一次血, 睇完報告冇問題就可以出院.

     

就快可以出院~

2008年1月28日星期一 (留醫第21日)

尋晚返番入o黎, 今朝醫生10:05到. 真準時.
叫我多搽aqueous cream. 可以考慮多住2,3日, 自己再諗清楚...... 特效藥neotigason的效果就ok o既, 比人快見效.

驚到去見醫生~請假中

2008年1月27日星期日(留醫第20日)

明明請o左假出o黎, 住o左一晚o者,個背脊就甩皮甩到咁. 真係嚇人~

因為甩皮, 所以一早就走番去QE比醫生睇, 仲想問下如果星期一出院,咁就不如今晚唔好返醫院. 9:40等到11:10至返o黎呀肥醫生.(死蠢,唔記得睇番本日記,睇佢上個星期日幾點返,佢上星期日11點巡房>_<) 仲要比佢潤, 話我唔捨得佢.
後來比佢check下d皮, 佢話係咁,隻藥係有d咁o既side effect.(點解請假出去先甩皮?唔明~)我再問佢係咪聽日走得, 如果係,我今晚就唔返o黎醫院. 佢話, 返o黎先啦,唔返o黎, d護士會報警喎,因為個病人唔見o左, 佢話返o黎棟高床板諗下,我問佢諗乜,佢話諗下住幾耐囉. 後尾仲話, 都未有咁快去旅行 (即係要住耐d)睇下再穩定d先喎.唉~!
我問佢出院後幾時覆診, 佢話2星期喎.如果d牛皮癬發得勁,就去油麻地搵護士長,安排早d睇醫生喎.

好驚呀~ 成個背脊甩皮.

2008年1月26日星期六
留醫第19日
醫院請假在家, 影o左唔少相.
牛皮癬進度良好. 不過個背脊甩o左好多皮. 好驚呀, 聽日都係返醫院問下醫生.
唔通空氣同濕度唔同?? 定係減o左藥o既關係呀??

放監啦~

2008年1月25日星期五 (留醫第18日)
睇完驗血報告, ok, 醫生放我走~ 哈哈. 住o左18日.終於可以出去抖下氣~.
今日開始neotigason由30mg 減到25mg....呵呵呵  yeah~!

好o野~可以減藥啦~ neotigason 30mg減到25mg

2008年1月24日星期四 (留醫第17日)
8:45醫生巡房,叫我聽日抽血(今晚空肚),明天見完醫生,可以放假放到星期日返o黎都ok,不過我話sat就返o黎,因為費事唔知點計,明天再問實醫生.
後來出去睇報紙, 肥醫生又同資深醫生入o黎睇下皮膚病人,好彩肥醫生拍下我個頭,提我入番房,資深醫生話我進度好好, 隻特效藥neotigason 可以由30mg 減到 25mg.肥醫生好似個學生仔咁. 好攪笑,資深醫生話食25mg食幾個月之後, 再睇下試下停藥,只搽藥膏睇下得唔得.事關隻藥都唔係太好.叫我輕鬆下個人,對個病都會好d.
頭先又問肥醫生,問佢係咪油麻地賽馬會, 佢話係隔離12樓, 肥醫生係2號房,資深醫生係1號房.

今日拆o左線啦~ 姑娘話咋,好似蚊咬咁. 不過都幾驚o架.

15樓養o既牛牛??

2008年1月23日星期三 (留醫第16日)
8:40分醫生已經o黎o左,我仲走o左去買報紙添,佢睇過我冇乜o野就走, 話我禮拜尾再抽多一次血,冇乜o野下星期初都走得,我問咁星期五咪唔洗出去?? 佢話都可以請假出去,星期一返o黎睇報告喎,o黎o左個牛皮癬病人,都係周身痕,周身紅. 2隻手臂好似有紅色紗布包住咁. 對腳就好似15樓養o既牛牛咁, 一撻撻.佢怕有副作用, 所以佢唔肯食藥, 只係搽藥膏.
正話5:40有個郭醫生(女)話可能會搵我做醫生學生考試o既對象,到2月中可能會打比我,如果皮膚好滑滑就唔洗搵我,如果仲有少少o野,就係3月2號入多一次醫院,3月3號7:00就比人問,問到傍晚6:00左右放人喎. 希望到時靚靚唔洗再比人問啦.~

驗血冇問題、可以請假啦~

2008年1月22日星期二 (留醫第15日)

今日醫生話驗血OK, 最初佢哎呀咁叫,等我以為驗血報告唔好添. 嚇o左一跳,醫生話可以星期五下午請假出街,星期日返o黎都得喎,我就諗住星期五出去,星期六返o黎就得,無謂出去咁耐,好似真係冇病咁,醫生睇完我d皮膚,都叫我搽多d aqueous cream喎.

你隻膿皰型牛皮癬、會屎人o架........

2008年1月21日星期一(留醫第14天)
醫生10點到,因為我成日問醫生我幾時出得院,所以醫生講o左好多o野.解釋o左好多o野. 可以出得院,但醫生就唔可以日日睇到我o既進展囉,我個隻又係膿皰型牛皮癬,係會死人o既,所以要好小心處理.... 都講得o岩o既, 出o左院就冇人睇到我. 除非我又再生牛牛生到好嚴重至會入番o黎.   
肥醫生話如果想放1,2日假,佢都會批我出去o既, 我話1日,但想上大陸, 醫生就話唔好囉.
1:30正話係出面試問醫生申請放星期六,即日返入o黎,問佢係咪要住埋下星期, 佢話係喎,屎得.仲要住多10幾日??.......實悶屎.      依家主要都係抽下血,驗下d藥對我有幾大影響.  
kenneso黎o左探我.仲買o左好多無印良品零食比我. 實肥屎.

等到頸都長~

同4日前比. 對腳好好多啦, 上面左係背脊

2008年1月20日星期日(留醫第13日)
今日肥醫生11點至o黎,等到頸都長.叫佢幫我影o左張背脊相,佢話d皮甩得好靚,話我去北京旅行有希望.(我打算2月9號去北京) 問醫生我下星期o既今日會係邊度.佢話唔知呢........吹漲.
後尾追住佢問佢係咪抽血, 佢話明天喎.仲話以後有排抽,隻藥neotigason其實4-5星期至知效果,所以我係算好快見效. 叫我去旅行時小心d, 戴手套, 痕就一定有,白色有藥性o既藥膏可以唔洗搽咁多. 改搽多d潤膚霜(aqueous cream) 今日肥醫生算係講得幾多o野啦.
左腳生多o左好多粒細細紅紅點, 唔知會唔會越o黎越多呢?
塊面好彩保得住, 正話見到有個男人, 佢個頭 (塊面) , 唔知係咪又係皮膚病.
(依家坐係出面)又見到肥醫生走o黎走去,佢問我寫o野呀? 我話係呀. 寫你d衰o野, 佢邊行邊答我, 咁要比多幾本我至夠寫, 我答佢:咁又唔拘喎. 肥醫生笑o左幾聲就走o左入C座.
仲賢仲熙o黎探我. 今日打o左比ホウビー　チャン & kennes知.

我個塊方飽~~~冇得食啦.

2008年1月19日星期六 (留醫第12日)
尋晚算係瞓得好多. 隻腳仲有痕,瞓瞓下又凍醒,又痕醒.
肥醫生今日休息,唔知係咪上個禮拜條茂李o黎巡房. 依家等緊沖涼,因為發覺仲未洗傷口. 亞媽又唔得閒攞湯o黎. 大豬又唔得. 今日實悶死.
巡房醫生12點幾o黎o左(KH YEUNG)好過上次條茂李,但唔似肥醫生咁互動,只係叫我咁咁咁, 都好o既,問我眼有冇乾,因為隻藥食o左會比較乾,叫我搽多d潤膚霜aqueous cream
下晝iris ,傑一家，yvonne都有o黎探我．　同ＩＲＩＳ傾計，錯過o左美味o既下午茶餐，冇得食個塊暖笠笠o既麵飽,>_<

嘈到嘔~兩個夜班

2008年1月18日星期五 (留醫第11日)
尋晚都係好痕, 好鬼難忍.
やっぱり姑娘嘈過病人.隔離床o既婆婆尋日入院時完全昏迷咁. 到半夜就叫姑娘, 叫到今朝好想有人比水佢飲, 但好多都話唔好比佢飲,(不過又唔見話禁食,禁飲水),有個化行晒妝著藍色白領製服o既護士:  姑乜鬼呀! 嘈嘈嘈!條女對住個鬼婆就鬼咁好, 晒英文了得.完全冇理會個老人家想做乜.第時我老o左, 唔知會係點.
婆婆見到我起身, 好大聲同我講句:姐姐, 早晨呀~ 嘩,嚇o左我一跳,因為佢尋日完全昏迷, 點知佢今日咁精神,其實佢好想飲水, 但我又唔方便比佢. 佢見我唔比佢飲, 佢仲話:我求下你啦~姐姐,我都唔知點算. 好想幫佢, 但又唔可以比佢飲, 咁我就再話比姑娘知. 咁佢地就比o左少少水婆婆飲.
尋晚兩個通宵班嘈到嘔,傾計完全唔理人,出儘喉嚨係咁傾.又嘻嘻哈哈
肥醫生成10點至o黎, 佢就好, 聽日放假, 佢問我今日抽血定星期一, 我話今日,佢又話星期日啦, 比佢吹漲 .今日冇乜特別o野.
我同隔離婆婆個仔講, 叫佢得閒就o黎照顧婆婆,早d o黎都得.因為護士姑娘佢地好忙, 唔睇得咁多.

資深醫生

2008年1月17日星期四 (留醫第10日)
廁所都唔夠擔去, 驚肥醫生又早o黎巡房, 真係冇比我估錯.8:45分就o黎到.話轉頭會再o黎.
9:45分左右又o黎, 肥醫生仲帶多一個資深醫生o黎(後來我知佢就係莊醫生).肥醫生詳述我o既狀況,資深醫生了解我病情之後,亦提及藥o既副作用,最少停藥2,3年至可以有BB,提肥醫生要幫我驗小便,仲叫我問杜偉雄醫生係1月4號幫我打o左支咩針,肥醫生話會幫我問喎.資深醫生睇下我D皮膚, 又睇下我個頭D頭皮. 肥醫生撞到尋日同事送比我個大花籃, 佢話:嘩,真係好大籃花喎, 我同佢講, 多得你唔少啦......嘻嘻. 有時大家講吓笑, 日子都快過D,跟住佢地兩個就走啦.
係10:10肥醫生又o黎過,比番張同意書我簽番個名喎,仲話比我知佢比人鬧, 肥醫生話:你睇我幾信你呀~!要驗小便睇有冇懷孕呀. ^_^ 呵呵, 比人鬧.
資深醫生話:如果我今次有膿皰型牛皮癬係因為杜偉雄支針o既問題,就有機會減藥,如果唔係支針o既問題,就可能冇咁快減藥. 最後肥醫生幫我問o左, 支針只係普通止痕針.
今日轉番出去大房33號床. (E5-5號床 => A8 38號床 => A8 33號床)
係單邊望到外面, 景觀好過38號床. 38號床好似坐監咁. 依家舒服好多.見到多D病人,
仲望到朗豪坊~即係亞媽屋企方向~都幾想返屋企.今日已經係留醫第10日


老細比我o既紙條

原來牛牛已經生到上塊面度~

2008年1月16日星期三 (留醫第9日)
肥醫生好早就o黎巡房, 未夠9點. 佢話要趕住去油麻地幫人睇病喎.
尋日o黎o既哮喘小姐轉o左去九龍醫院休養, 今晚得番我一個人,有d驚........
今日影o左幾張相. 原來d牛牛已經生到上面, 嚇死人

鬆毛鬆翼

2008年1月15日星期二 (留醫第8日)
肥醫生o黎巡房, 比上海婆婆讚2句就鬆毛鬆翼.^_^ 今日講o野特別多,佢話要去油麻地, 又要去東區醫院喎.上海婆婆讚佢好人, 我話係呀~ 佢好好呀.醫生就話: 緊係啦, 我夜晚9點幾都o黎睇你喎, 我窒肥醫生: 不過你冇藥比我食呢~
窒死佢, 哈哈.
上海婆婆今日出院
冇乜特別o野. 手,肚,背已經甩晒皮.仲有對豬腳未甩晒.

隔離床婆婆好番出院啦.

2008年1月14日星期一 (留醫第7日)
肥醫生o黎巡房, 佢話我d皮甩得好靚, 緊係啦, 我咁聽佢話,早晚都沖2次涼,仲完涼搽藥膏, 一個小時後搽aquoeus cream, 得閒又搽, 痕又搽. 鬼都靚啦. 哈哈.
佢仲話我食 Neotigason食得好有效. 因為有d病人, 可能食2星期至見效喎, 我食第2日就有反應, 比佢想像中快.
隔離好好傾o既婆婆出o左院啦. 傍晚o黎o左個上海婆婆. 佢高血壓入o黎觀察一日.醫院唔夠毛氈比佢用, 到夜晚8點幾見佢瞓著o左,但又冇氈, 幫婆婆問個肥醫務人員,我問佢有冇氈, 佢話咩氈呀??? 態度超差,我話隔離婆婆瞓o左但冇氈, 佢冇再出聲,但轉個頭就攞張氈比婆婆.

隻Neotigason勁~ 已經冇膿生出o黎~ yeah~

2008年1月13日星期日(留醫第6日)
入o左o黎第6日,唔知幾時出得院.
今日肥醫生有返. 成11點幾至巡房,等到頸都長. 佢睇到我d皮膚, 話食o左2日, d藥好有效, 比佢想像中快. Yeah~!
晨早比我食 Neotigason , 就唔洗對腳出牛牛啦. >_<
再問肥醫生d藥膏點搽, 比佢話鬼我.仲話聽日再問番我喎. 醫生呀醫生,病人邊度會聽一次就明, 咁多隻藥膏,講多次都唔洗死o架. 係你成日問我明唔明白o既, 唔明問你, 又比你話.........

隻neotigason藥除o左生畸貽之外. 仲會令個咀唇乾,口角爛, 腳會甩皮. 頭髮又會甩少少等等.
日日飲一大壺水~ 勁~!

肥醫生放例假、o黎o左條茂李巡房.

2008年1月12日星期六 (留醫第5天)
肥醫生今日例假.
o黎o左個唔知乜水巡房, 10問9唔識答. 我同隔離婆婆都覺得佢成碌葛咁.
食o左 Neotigason 30mg 第二日, 手上面o既膿已經冇再生出o黎. 好開心.
講下我點搽藥,點食藥.
8:00前食早餐,跟住食neotigason 30mg & chlorphenramine maleate (piriton)止痕丸
8:30沖涼洗頭,有牛牛o既地方搽類固醇藥膏 fluocinolone acetonide (synalar) cream 0.1% (搽晒都要成30分鐘)
9:30又入廁所全身搽 aqueous cream (冇類固醇,純保濕)
之後得閒就搽aqueous cream ,雖然唔係止痕膏,其實有時痕係因為皮膚乾燥,所以我經常搽,尤其是肥醫生有次見我抓來抓去.叫我唔好抓,搽多D aqueous cream之後,我就將呢句說話記入我笨笨o既腦袋裡. 縱使我經常唔記得人地講乜.但醫生呢句說話就一直留係我腦海裡.而且我d皮不停咁甩,搽o左aqueous cream真係可以幫我加快甩皮.
仲有有一次比醫生見到我搽aqueous cream 搽到隻手白side side,佢又教我點搽
唔好意思呀下,(佢捉住我隻右手示範) 嗱, 咁樣薄薄地搽,你搽太多都冇用,浪費晒.我地俗語講:少食多餐.搽薄d,搽密d,  
一句好簡而有用o既說話~自始我就識得點搽aqueous cream啦.
總之我一日都不知搽幾多次aqueuos cream, 3,4日我就搽晒一樽 300g
20:00我又入去沖涼, 又重覆搽類固醇藥膏, aqueous cream. 本來仲有一隻勁d o既類固醇藥膏 (diprogenta cream) . 醫生話fluocinolone acetonide(synalar) cream 唔得至搽另外一隻勁藥膏. 但基本上我都唔識分咩叫搽o左唔得. 所以我真係極少用囉.
21:30上床瞓教.

你依家都冇藥食~~~

2008年1月11日星期五 (留醫第4天)
因為奇怪點解食住藥, d牛牛都會生出o黎, 見到醫生巡房就問佢啦.
疑惑o既我: 醫生, 點解我一路食住藥, 一路都生牛牛出o黎o既??
肥醫生:(好輕描淡寫咁講) 你依家都冇藥食!!
心諗: 唔係呀化~
驚慌o既我: 咁我呢幾日食個d係乜藥o黎o架??
肥醫生: 你食緊個d係防敏感(止痕) & 抗生素.
        我: 咁點解冇藥食呀??
肥醫生: 藥房都仲未攞o黎~
         我: 吓~!醫生咁你快d同我攞啦, 我唔想連塊面都有牛皮癬呀~~~!
冇幾耐, 護士就攞o左d藥比我食啦~  NEOTIGASON 特效藥 30mg/天
唔可以同抗生素一齊食.
食之前, 醫生講o左好多次, 食呢隻藥唔可以有BB, 因為會令BB畸形. 所以佢問o左我好多好多次, 講o左好多好多次.
甩o左皮o既手, 依然生番d膿出o黎, 有d擔心.

比醫生割o左少少皮~ _

2008年1月10日星期四 (留醫第3日)
12點幾, 醫生o黎割我少少皮走,縫o左3針.
肥醫生舖張o野落床,我隻左手放上去.再放塊布遮住我睇唔到佢割我d皮,搽d麻醉藥,割落o黎第一刀, 肥醫生一邊割一邊同我講, 嗱, 呢一下係最痛o既. 佢真係冇呃我, 真係最痛個一刀(其實有麻醉藥,根本唔覺得痛,但感覺都幾恐怖),後尾佢同我縫針,我都唔覺, 仲以為佢同我貼緊膠布.
Biopsy報告要6個星期至出o黎
24號拆線
下午搬o左我去A8 38號床.
原來係醫院o既病人, 就算你行得都好. 佢都會用架輪椅推你去目的地.我只係皮膚有事,所以實在唔係好意思比人推住架車行,而唔洗自己行.
3點幾到A8 38號床~ 正!2個人一間房, 之前係E5, 夜晚D護士/亞嬸/病人, 實在嘈到瞓唔到.稍後有一個64歲婆婆o黎瞓係我隔離. 都好好傾.
隻腳生o左好多牛皮癬,條頸都有.奇怪!點解一路食住藥都會生牛皮癬...........
手開始甩皮....                                                                                                           
呢幾晚都係有微燒.
夜晚瞓瞓下就會比d姑娘叫醒量血壓&探熱. 次次都驚會變高燒.....

 
 
 
 

第一次見主診肥醫生

2008年1月9日星期三 (留醫第2天)
瞓o左成日, 都係冇醫生o黎睇我, 問實習醫生我幾時出得院, 佢話我好似燒傷咁,仲想出院呀~   我都冇聲出 . 佢話要等皮膚科醫生o黎至可以比藥我食. 我問佢醫生幾時o黎, 佢都唔知, 跟住係我面前打比醫生辦工室, 好似護士話皮膚科醫生個個file都攞,淨係冇攞我個個, 唔係呀嘛?? 攞剩我個file??
等到下午都冇人o黎, 只係有姑娘同我量血壓, 探下熱. 當其時對政府醫院都有d失望.不愧為政府醫院, 入o黎2日都冇醫生睇我, 但見佢地個個都好忙. 唔對路醒起尋日私家專科葉醫生吩咐我, 叫我3,4點打比佢. 講下我咩環境. 咁我又check過公司醫療都cover到. 就想轉去私家醫院.
唉~點知打比葉醫生, 話佢知我想轉私家, 佢居然話: 冇人牛皮癬入私家喎~咁即係點? 唔理我呀? 哦一聲, 我就收線. 講多無謂.
實習醫生再同我直接打比皮膚科醫生. 聽佢依依哦哦.問佢o黎唔o黎, 答案係唔o黎,因為好忙,好似話要開會...................又要等明天.
點知晚上9:30左右, 皮膚科醫生突然殺到o黎,佢話飯都未食就趕o黎睇我,醫生睇我兩睇, 話要割我少少皮去化驗係咪牛皮癬.不過睇個樣都係o架啦.仲講2種醫法(食藥方法) 有一種話要放支o野落個肝度,每半年攞番出o黎驗下.未聽清楚已經想暈, 第一次留醫, 第一次割皮.............仲話插支o野落個肝到.............
個醫生都唔算嚴肅,肥肥地.四眼o既. 講o野好鬼大聲. 佢問我即刻割皮定係聽日.我話即刻啦, 佢又話等我聽日覆. 吹漲. 我驚佢聽日又唔知幾點至o黎.
醫生係我個檔案度寫o左好多o野, 又寫o左張藥方. 差不多有成10種,止痕藥呀,類固醇藥膏都有幾種,原來又要分搽面, 搽身又唔同.搽身又有輕類固醇,中類固醇,洗頭水又有, 保濕膏又有. 林林種種.可能聽日有得開始食藥.

我的第一次膿皰型牛皮癬Pustular Psoriasis~

2008年1月8日星期二 (留醫第一天)
1月5號睇葉x焜醫生知道係牛皮癬,都仲未感受到牛皮癬o既大鑊,
2隻手不停咁生d牛牛, 跟住就係肚,背脊,連肚臍都生埋.
有牛牛不特止, 仲係有膿個隻.
1月8號早上, 2隻手臂實在又熱又腫, 非常唔舒服. 會計小姐放完假第一日
見到我雙手臂, 嚇o左佢一跳, 又真係幾嚇人o既................ 比佢叫o左兩叫,
再上網睇下d資料. 知道可能係膿皰型牛皮癬,個心有d驚, 因為網上資料話:
如果有發燒, 處理得唔好, 就會有性命危險.
心諗: 唔係呀嘛? 六合彩又唔見我中.
尋日其實都有話個情況比葉醫生知, 但佢聽到我周身膿都好,
又冇叫我返去診所比佢睇. 到今日會計小姐叫我早d返屋企休息.
我見咁早 (下午2點幾) 就試下去搵葉醫生.
佢一見到我, 就二話不說, 寫o左封轉介信比我入QE,
跟住同我案件重演, 對口供. 仲吩咐我唔好排錯隊, 要入急症室.
吓~~!唔係咁嚴重呀嗎?? (心諗)我都唔敢問醫生,乜我嚴重到要立刻入
急症室咩?
驚到想喊~   即刻由荃灣坐地鐵去佐敦再行去QE.
因為驚住醫院肚饑, 所以出o左地鐵就買o左份三文治, 再加條麵包.
打比大豬&亞媽話比佢地知我要入QE. 今日係大家姐生日. 係倫敦擺o左幾圍.
亞媽特登飛的入去, 大豬就趕緊關舖o黎會合我. 其實屋企人真係好關心我呢~
去到急症室探熱問資料抽血, 等o左成個鐘,6點幾至上到E座5樓5號床.
嘩~因為2隻手臂已經又紅又腫, 所以量血壓時非常之痛, 好似痛到爆咁.
(入院前2日, 入院時比相片嚴重)