牛牛病: 再見啦~ 我o既至愛

2008年5月31日星期六天陰有微雨
今朝book o左劉漢長醫師9:20 , 不過尋晚瞓唔著, 所以遲o左10分鐘. 等o左半個鐘就有
得睇. 最近聽超人老豆講, 佢睇劉醫師時, 接待處o既工作人員話劉醫師要減少睇病人,
因為想用多少少時間睇病喎, 咦!?? 唔通佢有睇我個blog, 知道我話佢?? 哈哈. 緊係唔係
啦. 咁今次我見我之前o既病人, 幾個都睇得好耐下. 唔同上次, 入o左去, 一陣就返出o
黎.
我今次都覺得劉醫師睇耐o左少少,大約4分鐘到. 探完左右手o既脈,我就比張紅點相劉
醫師睇.我問佢大粒個粒係咪牛皮癬, 佢話唔係, 係敏感喎... 敏感都咁大粒?????!!!!屎得.
唉~!不嬲我都冇敏感o既, 真係人老o左就開始轉差
不過下星期一 (2/JUN) 見肥醫生時, 我都會攞番呢張相問佢o既. 唔知佢會講乜呢?

劉醫師睇我條脷, 呢輪我條脷好鬼白. 我問醫師點解咁白,劉醫師話我唔止脷白,仲兩邊帶黑, 佢答我: 濕囉~! 跟住我問佢, 咁點解救呀???   醫師答我: 唔好飲凍o野.   我話: 我已經冇飲凍o野好耐啦........
出o左院之後自我監察, 好多o野都冇食.   唯獨係雪糕.............我的至愛, 以前晚晚一條雪條,有時仲打孖上. 出院後冇食2個月左右, 最近漸漸食多, 幾乎每晚一柸雪糕.
我居然問o左劉醫師一條豬頭炳o既問題:
醫師答我: 唔好飲凍o野.     我話: 我已經冇飲凍o野好耐啦........跟住我問劉醫師, 雪糕係咪凍o野呀???. 我見劉醫師好似想偷笑....... :係凍o野o黎o架, 唔好食..........跟住仲要係張藥單上打上"忌食生冷"