東華中醫第一回合

2008年4月28日 天陰
今朝約o左10:30睇東華醫院睇劉漢長醫師.
因為係牛皮癬討論區都有幾多網友提及劉醫師,所以係停西藥之前.睇一睇聽下醫師意見.地址係:上環普仁街12號東華醫院楊國璋樓地下:預約電話: 25894700.
去到都要搵一陣至搵到, 發覺個度有d工作人員都好似有皮膚病咁.^_^,聽電話個個哥哥仔額頭有好多粒粒.但唔似暗瘡. 同我量血壓個位護士. 條頸又唔知有d乜咁. 真奇怪. 等o左大約20分鐘就入去見醫師. 佢先同我左右手把脈,睇下我條脷.佢問我有d乜唔妥,我話佢知依家d皮冇事,比埋本想簿佢睇下我之前病發時的牛牛相佢睇.話佢知係我停西藥前睇下中醫,佢叫我小心d身體.唔好冷親發燒.同埋小心感冒. 因為呢2種睇落好輕微o既病, 會引發牛皮癬.可能會發好多牛牛出o黎. 所以要小心.呢樣o野我都一早知o既. 佢話我條脷2邊帶黑係因為血液循環唔好喎.
真係唔慣醫生戴口罩.劉醫師都唔例外. 不過我慣性望住人講o野. 依家佢戴住口罩,所以硬係好似聽唔到佢講乜咁. 尤其是佢d半鹹半淡o既廣東話, 其實好想叫佢不如講晒國語.
最後開o左3劑沖劑比我.(依家真係先進) 叫我3日後覆診.但邊度有咁多時間o者.雖然份工都可以蛇出去. 但唔想咁趕, 佢話我呢d病, 都唔係一朝一夕就醫好. 所以唔準時覆診都ok. 諗住星期六覆診,嘩~!點知要排到5月17號呀~.