牛皮癬相簿

呢本相簿只係我牛皮癬病發o既其中幾日o既相. 因為最初入院留醫時,我係冇帶相機入院,所以實際上牛牛o既嚴重情度比依家顯示出o黎o既相勁o既. 不過真係好多謝肥醫生睇住.所以d牛牛真係收得好快. 多謝肥醫生~


未經肥醫生同意,亦唔想影響佢,所以我將肥醫生變成貓樣. 唔好意思

呢張相係我貪得意影, 以為好快好番,所以影低d牛牛,點知兩日後就入o左QE留醫,d牛牛生得好快,1月4號都只係手臂有牛牛,到1月5號就周身都有.我個d係膿皰型牛皮癬,係牛皮癬裡面佔 1%都冇, 如果有發燒,處理得唔好,就會有性命危險,其他尋常型牛皮癬,唔會有性命危險o既.唔知點解我咁好彩中到正一正.,我7號開始就有微燒.1月8號入院

呢幾張相係肥仔o黎探我既時候, 諗住影番去比老爺奶奶睇. 當其時背脊都已經好嚴重
牛牛發紅之外, 仲會腫腫痛痛o既. 瞓覺轉身都好辛苦.
細細點個d係無菌o既膿. 切皮化驗後證實係
膿皰型牛皮癬. pustular psoriasis

因為冇帶相機入院,所以呢段期間冇影到相.再影已經係一個星期後,其間一對腳生o左好多牛牛出o黎,通常生完牛牛,會又紅又腫2日, 咁至開始甩皮,依家睇到呢張相.對腳已經退o左d牛牛. 其實2隻大脾曾經係好核凸
已經退o左好多牛牛, 但發覺原來牛牛已經生到上面.

d牛牛來也快,退也快, 而肥醫生話我食Neotigason特效藥,比其他病人食得快見效.所以4日後o既牛牛已經退到好淺色. 其實我日日無時無刻都聽肥醫生話, 唔好抓d牛牛,痕就搽保濕膏aqueos cream,沖完涼就搽 fluocinolone acetonide cream 0.025%
對腳不停咁甩皮...

留醫第19日都好OK.(請o左一日假返o左屋企)

右手至o岩

無啦啦甩咁多皮,,,,,早幾日都唔係咁.

留醫24日終於可以出院. 其實仲有好多牛牛印.

 基本上手,肚,背都好靚仔, 係對腳差d. 因為我唔想搽太多類固醇藥膏, 所以對腳都仲有好多紅印.  不過無所謂啦.

我第一次入醫院留醫. 感覺上完全ok 喎.無論醫生或姑娘護士.

做o左本相簿送比肥醫生(係橙色o既麥麥封面), 但唔知有冇用, 下次覆診問下肥醫生先.

藍色呢本係我自己o既.~

第一次覆診~瘀到痺

2008年2月4日星期一
第一次去油麻地12樓覆診.
好緊張,予約時間係3:00 我2點幾就去到. 見到肥醫生走來走去, 唔見佢著住件白袍.真係第一次覺得佢肥. 點解醫生都咁肥o既??
佢睇唔到我.但我見佢望住個登記窗口,因為我張覆診紙寫我去3號房, 明明2號房先係肥醫生, 所以我出院個日肥醫生就同我講, 如果登記窗口唔幫我轉番2號, 佢就會幫我. 所以我見佢行o黎行去, 都有望下登記個窗口位置.以便見到我就幫我. 可惜我一早攪掂,哈哈.
點解1月31號出院, 2月4號就覆診. 第一,醫生緊係驚我唔慣, 第二, 最大原因係我出院時,QE比唔夠aqueous cream我. 醫生知我去北京旅行, 天氣乾燥.所以佢話過, ymt可以比多d我. 故此. 4號覆診. (以上都係我段估o既, 唔關肥醫生事 ^_^)
佢檢查我d皮膚, 又話比護士知我d皮醫得好靚,仲拿起我件衫,比我個背脊比護士睇, 都唔洗理我同唔同意.(打得少) 唉~最唔慣係仲要除埋條褲. 真係唔慣, 因為係QE件病人衫咁鬼長,唔洗佢叫我除, 我都除比佢睇啦. 但係今次, 前後一個人. 真係瘀, 但瘀都要除啦~鬼叫我有病呀......................
醫生講o左好多o野, 仲多謝我上次送小禮物比佢, 我扮聽唔到, 因為我唔想比護士知,點知醫生又講多一次多謝. 不過我就繼續扮聽唔到. 轉話題改問其他關於牛牛病o既o野.(對唔住呀,肥醫生. 我真係好冇禮貌)
攞o左3樽aqueous cream & 黃色&藍色止痕藥.
第一次冇帶袋去裝藥. 下次要記得帶.
3月3號覆診.