出o左報告~

今日臨放工, 莊醫生打比我~

(嚇了一跳, 點解唔係護士打o黎??)

莊醫生話我d報告出晒~

唔係痛風, xx因子又呈陰性,

所以唔係類風濕關節炎,

又唔係紅斑狼瘡

莊醫生話大路o野已經幫我驗晒 .....乜都唔係

(360蚊驗咁多o野, 莊醫生真係收順我)

x-ray 報告又冇顯示我d軟組織被侵蝕,

所以我以為我唔係牛皮癬關節炎, 再向莊醫生確認啦,

點知佢話唔係唔係牛皮癬關節炎, 而係有可能係牛皮癬關節炎~! (我聽到呢度有d唔明)

牛皮癬呢家o野真係好鬼老土, 冇一樣o野係證明....係呀係呀, 係牛皮癬呀~

例子1: 我之前個身生膿皰型牛皮癬, 當時係QE做切皮化驗, 報告話我D膿冇菌.

即係代表我係牛皮癬 (咩o黎o架?? 點解唔係驗到某樣o野就代表係牛皮癬呢??)

例子2: 腳甲,,,,,,,,,剪2次腳甲化驗, 冇菌.....又即係代表係牛皮癬腳甲. (有菌代表係灰甲)

例子3: 今次手指關節腫............結果呈陰性就否定係類風濕關節炎, 否定係紅理狼瘡,

最後就變成有可能係牛皮癬關節炎 >___<


聽完莊醫生解釋, 緊係有d唔開心, 不過其實唔係真係代表我有牛皮癬關節炎,

因為可能我撞襯自己唔知, 所以.....如果今次好番冇再腫, 咁就可能冇乜o野,

就算依家係牛皮癬關節炎, 莊醫生話都係好輕微.

早幾日有病友問我牛皮癬關節炎唔係會有晨僵咩??

(晨僵---即係早上起床時,脊骨會好痛, 僵直, 不過大約30分鐘後痛楚會減弱)

所以我順便再問莊醫生, 莊醫生話牛皮癬關節炎唔一定係由脊骨開始的.

有d病人會由手指或腳指關節, 多數都係手指第一截開始腫痛


莊醫生叫我得閒就去攞番d報告, 今次問題唔大, 叫我唔好再嘥錢出去驗,

叫我攞番d報告, 下次去油麻地政府時比政府醫生跟就得o架啦~


報告完畢

多謝莊禮賢醫生~ 





了解牛皮癬關節炎
http://blog.yahoo.com/_M3DUN4GYMOYBPTPHCTCB6JI4QQ/articles/61140

殺到o黎??

無陰功呀~ 尋日開始手指尾對落, 好似撞瘀咁痛, 尋晚瞓覺仲痛下醒下.

不過今日上午仲可以揸埋隻手, 所以不以為意,

下午去油麻地覆診睇牛皮癬都唔識得問醫生,,,,,到4點幾返公司,

越o黎越痛, 忽然醒起我會唔會係牛皮癬關節炎...........大鑊

急打比3個病友問下點算.......

今晚痛楚伸延到手指尾最尾個截.

紅腫 + 發熱, 炎症啊........>____<

痛到合唔埋d手指.......屎囉.....

17個星期後至有得覆診....點算呢??  (腫到雞脾咁)

正話偷食老媽d消炎藥, 聽日仲係咁勁就睇普通私家,

等佢寫信我去睇專科, 然後去睇莊禮言醫生, 抽血睇下發炎指數.

問下佢係咪牛皮癬關節炎........(公司有買醫療, 程序上要由普通科轉介去專科至claim到錢)

聽講話.....牛皮癬患者, 約30% 係病發5~10年內會有牛皮癬關節炎.

如果證實係,,,,我又中頭獎啦.........(佢老鼠)




(手指尾好痛, 依家慢慢打blog, 聽日如果冇blog出, 即係代表痛到打唔到~

星期日仲約o左院友去上山下海, 個幾月冇去, 好想出去行下啊)