滿3個月了~

2009年2月4日 星期三

o岩o岩同blog友提起睇劉醫師.

數下手指08年4月尾開始睇東華劉醫師, 5月開始飲中藥, 話咁快就已經睇o左劉醫師9個多月....原來飲o左成9個月中藥, 最初飲999藥粉, 後期改飲農本方.

就咁睇,,,,,飲中藥我好似冇乜o野改變,,,,其實08年4月睇劉醫師時, 我身上面本來就係冇牛牛. 只係額頭有. 食錯o野又會出下紅點. 當然我到10月為止. 都係中西合壁, 又食醫牛皮癬o既neotigason西藥, 又飲999藥粉.

我真係唔肯定中藥係咪醫到我個牛牛病. 但起碼飲o左9個月....我額頭o既牛牛不見了. 手上o既紅點出少了. 11月3號停食neotigason呢隻藥之後. 暫時都未見有牛牛蹤跡. (希望唔好同牛牛相認啦)

西藥繼續停, 中藥繼續飲...下次問下劉醫師, 一日飲一劑得唔得, 咁樣一個月o既中藥費就可以由1,300蚊變為約650蚊啦......

除o左飲藥之外. 生活習慣係比病發前好. 但亦有繼續不良習慣. 就係夜瞓.  夜瞓其實係牛牛病大敵. 所以我要積極去改善.

另外改用柚子皂沖涼. 改用精油洗頭, 停搽aqueous cream 改搽 EUCERIN CALMING CREME,我都覺得好有用. 尤其是 搽o左 EUCERIN CALMING CREME呢隻係美國買o既cream, 我o既皮膚再改善了.(之前鞋拾拾o既雙臂冇咁鞋, 成日凸起o既毛囊變成唔多凸) 本來搽AQUEOUS CREAM 我都覺得幾好. 因為UNCLE TOM提醒AQ 其實唔多好,建議搽EUCERIN CALMING CREME之後, 以前開始搽AQ出現o既黑點少o左好多. 而且變成唔凸出來,,,,,之前我已經懷疑頸上面o既黑點,係因為搽o左AQUEOUS CREAM之後先生出來.....不過AQUEOUS CREAM售價又實在平.......而EUERIN CALMING CREME, 我又只能夠係美國至買到. 運費又夠貴.如果唔係就要等人係美國o黎香港至帶到比我.不過根據幾個同樣用過euerin calming creme 同 aqueous cream o既病友提供o既資料.確實係euerin calming creme 比較好用. 但價錢係一個問題.

有人問點解我係油麻地睇政府攞咁多AQ........ UNCELE TOM o既講法, AQUEOUS CREAM唔好長期搽係皮膚上, 但可以用o黎沖涼都得o架.所以又唔洗當AQUEOUS CREAM 係毒藥.

 

開工覆診~

2009年2月2日 星期一
今日開工大吉~ 公司得番4個人 + 老細.
雖然人少. 但都幾清閒.
下午要去覆診~ 另一個同事又係今日突然請病假覆診........佢呢排成日請假睇醫生.
所以肥仔叫o左個同事入房照o左一陣肺~仲話比個同事知, 要覆診就安排星期六或放工後. 仲比埋我張請假紙同事睇:::::::嗱~好似cowcow個d政府覆診, 冇得星期六或放工睇. 所以我就可以請假去覆診云云.
我就因為咁, 所以唔多夠膽下晝即走...拖到3點至走人.
去到油麻地都3點8, 又轉o左醫生啦. 唔係之前o既林女醫生. 轉o左個梁醫生.
呢個梁醫生. 好似係之前隔離房個個. 成日出o黎飲水o既男醫生.睇病求其. 話佢知又唔聽. 係要等佢想知至可以講比佢知...  睇頭皮又要我拿起d頭髮比佢睇(之前拿起比佢睇, 佢又唔睇)........ 睇完只係話幾好呀. 幾好呀...咁......  屋企因為冇晒藥膏乜滯, (老媽排到5月至第一次睇專科) 所以又攞番以前張QE留醫時o既藥單比梁醫生睇..   係咁易就攞o左下面咁多隻藥o黎睇門口~
梁醫生話我d皮皮咁好, 叫我3個月後至覆診. 我話唔得呀~停o左藥都係驚佢會爆發番出o黎. 要求8個星期覆診. 佢又講,,,,,3個月後都係5月咋喎....唔係差好遠o者.......我同梁醫生講:::::::唔係呢....我都係驚呢...又驚之後要出差..........好啦好啦. 今次8個星期. 下次要隔耐d o架啦.... 梁醫生無奈地回應我o既要求......         呵呵...得手..............