減藥? 停藥?

2008年7月28日 星期一    熱到已經沖o左2次涼.
下午請o左假去油麻地覆診, 放o左工返屋企沖o左一次涼至去. 覆完診返到屋企都係要沖多次. 真係難為人地係戶外工作o既人.
今日YMT人唔多呀~ 好快. 半個鐘已經走得. 最快今次.
都係女醫生. 佢問我係咪停藥, 我話比佢知我最近多o左頭皮, 同埋我問佢我依家係食15mg/日, 會唔會減到10mg, 佢話都好. 所以佢今次就話減到去10mg.
不過我決定明天起我自己停藥啦. 有咩依郁至食番啦. ((最後我都係冇自己停藥)) 
停藥1個月~個半月至知停藥會有咩問題. 會有幾多牛皮癬生番出o黎, 雖然真係有d擔心, 但停藥呢一日遲早都會o黎, 都係早d面對吧. 希望中藥個邊會幫到我.
同埋停藥後真係要認真戒口. 尋日係深圳食o左2串羊肉, 今日塊面有2粒豆豆 & 一粒好細粒有膿o既暗瘡仔.
唔~ keep好自己情緒, 雖然今日有兩單超煩o野, 但都係自己問題o者, 自己攪掂執埋d手尾就ok. 
好驚但都係要面對吧.   強哥, 記得幫我祈禱~.

膽固醇 2.8

9月29號覆診.

東華覆診

2008年7月19日 星期六  天晴
遲o左22分鐘至去到東華, 行到身水身汗~
去到見到冇上次咁多人, 諗住會好快走得, 點知都係要成2個鐘.(好大原因我隻999藥粉係要成個鐘至執好o既.)
今日見到兩個病人, 一個15,6歲左右, 佢全身長衫長褲+鴨咀帽. 媽媽陪佢o黎, 見佢入o左劉醫師房, 足有30分鐘, 唔知係咪嚴重得滯.所以睇得特別耐.
另一個就太太陪o黎睇. 佢髮線,耳仔,手腳都有好多. 不過佢好似冇乜o野咁. 悠然自得咁嘆報紙 & 上網.
等o左45分鐘至有得睇, 把脈睇脷全部做晒, 劉醫師再次叮囑我唔好食生冷o野.因為我條脷兩邊都仲係黑. 醫師仲問我有冇口乾同埋唔知乜, (我唔識聽) 我話佢知最近好口乾,所以今次藥方有少少變動,我問劉醫師呢d藥有咩好,劉醫師講o左8個字, 但我只識聽"滋陰涼血" (其實都唔知有冇聽錯, 但又唔好意思叫佢將個8個字寫出來) 醫生知我夜瞓o左, 仲係張藥單上叫我"保持充足睡眠"
查番d藥方, 原來係6月28號已經同我減走o左"南沙參", 今次7月19日仲將"石斛"&"玄參" 由20克減到10克,  "地黃" 就有 15克 加到 30克.
今次藥方

上次藥方

6月16號藥方.

仲有我比劉醫師睇下我隻右腳, 因為最近多o左d紅點係腳,反而手就冇出紅點. 佢叫我千祈唔好抓d紅點. 因為會有機會引發牛牛生出o黎. 但呢d就唔係牛牛.

今次遊東華手信, 加應子一大包.

攞o左3星期藥,  
8月9號覆診.

Pp-->牛皮癬-->東華劉漢長醫師-->大改善

Pp 

同jjen 一樣, 我都係想將你地o既醫病經過放上blog, 方便其他牛牛blog友. 因為其實呢輪都幾多牛牛友打比我問牛皮癬o既資料......

如果唔方便我抽你o既留言放上blog, 請通知我一聲...謝謝

pp 2008-07-07 23:44

我是再生會那個有二十年病齡的人，七年前我的病情惡化，全身都有牛牛。這七年我都堅持只接受中醫的治療，最初四年多我看過約六個中醫，都沒有好轉，夏天仍要穿長袖衫。直至06年1月，我開始接受劉醫師的醫治 (當晚我在再生會說看了劉醫師三年，實則只有兩年半)。
當時我病況很嚴重，劉醫師都有叫我參加他們的科研計劃，免費接受半年的療程。但由於有機會接受西醫的療程，所以我拒絕了，寧願自己比錢，只接受劉醫師的治療。最初的幾個月真的沒有什麼進展，但半年後，情況好了好多，當時正值夏天的七、八月，我已可以穿短袖衫了。但一到冬天，又會開始惡化，全身長滿牛牛，不過到了夏天，情況又會好好多。
總結這七年的中醫療程，劉醫師真的令我的病情有好大的改善，雖然未能完全康復，冬天仍會惡化，仍要不斷地吃中醫，但起碼夏天我可以穿短袖衫，之前的四年我從未試過穿短袖衫呢。


--------------------------------------------------------------------------------------------

pp 2008-07-10 11:07

cowcow，我唔介意你將我的留言放上blog，你都係想提供多些資料比有牛牛的人，你做這個blog真係好有心機。

同 jjen 一樣，我唔想令人覺得我神化咗劉醫師。我未完全康復，身同腳都仲有牛牛，只是對手算見得下人，可以穿短袖衫。到了冬天，我的病情仍會惡化，全身又會長滿牛牛。劉醫師有講過冬天會對病情有影響，但我唔記得佢有無講過原因，我諗同乾燥有好大關係。

中醫並非同毎個病人都可以夾到，唔同人會有唔同的效果。jenjen現已停藥四個月，我有好大的改善，但仍會反反覆覆，我諗我始終有廿年的病齡，難以會有jenjen的效果。所以，我希望想去試劉醫師的病友，請先抱着 ”試下無妨” 的心態去看會較好，有好轉固然是驚喜，就算不幸地不能轉好或惡化，也不會太過失望，因為畢竟牛牛是很頑強的。

cowcow 2008-07-10 13:49

PP 多謝你o既回應.  
因為當初有牛牛病, 我曾經上網搵o左好耐.都搵唔到d實際資料, 又想知道其他病友點樣去醫, 又或者用o左咩方法, 結果又如何等等. 可惜一d都搵唔到,有時搵到o既都係一d病友將自己個病寫得隱隱悔悔.
我係日本網就搵到一個較為詳細, 資料豐富o既網址.可惜個個日本人只係寫到05年就冇再繼續寫落去. 而且日本o既醫治方法,食療等都同香港有好大分別, 所以我就想開blog,記錄下自己有病後o既生活. 當然有用資料係欠奉o既. 所以都係要靠你地各病友資料才成事.
我都係好似你咁諗. "試下無妨"o既心態.
同幾個blog友傾電話.有一個係睇緊劉醫師, 但好似睇o左之後發o左少少出o黎, 佢就想同jjen了解下睇劉醫師時, d牛牛狀況會如何變化.其實有人係身邊鼓勵下, 真係事半功倍的.
有d病友就想試其他方法. 當然佢地有佢地o既選擇. 我亦唔係幾方便比意見, 只係知幾多講幾多. 但有時知道佢地都用o左唔少錢,又或者睇錯醫生,攪差o左個牛牛病, 就替佢地心痛了.
有一次聚會. 知道一個病友曾經睇劉醫師,佢睇o左幾個月話唔多得. 我地問佢煲藥 定係食藥粉..佢話係加錢比人煲埋藥個隻.我問佢係咪飲o既時候就煮番熱o黎飲. 但佢o既答案好攪笑...
佢話係個雪櫃裡面攞袋中藥出o黎, 插支飲管入去藥包就咁飲.
我當堂 O晒咀........
所以話夾唔夾個中醫之外, 都要睇下自己究竟有冇跟人指示去做呢.
-------------------------------------------------------------------------------------------

pp  2008-07-12 01:18

我有時睇番討論區的舊posts，雖然仍未睇晒，但睇到好多病友為咗醫好牛牛，真的各施各法。我覺得牛牛病最麻煩係，對甲有效的方法，對乙郤無效，所以如果病友要選擇其他方法時，真係唔能夠比太多意見。

有些病友的經歷，同自己都幾相似。例如有病友嘗試吃龜苓膏，我都吃過一段時間，我吃的並非幾十元一盅，而是七年前一盅要二百幾嗰種，結果當然係無用。有個階段我放棄醫治，偏激地覺得中、西醫都無辦法醫，而且吃藥對身體唔好，所以中、西醫都唔睇。返工要見人，當牛牛擴散到額頭、面同頸時，就堅持唔到了。我當時選擇睇中醫，因為我覺得西醫治標唔治本，吃西藥及搽藥膏時，可以壓住牛牛，但停用時往往復發得更厲害。

輾轉睇咗多個中醫，直到睇劉醫師才有好轉，我覺得timing都好重要。當時我睇劉醫師係冬天1月，開始幾個月沒有什麼好轉，換轉其他人，可能已經放棄了。不過老實講，如果我唔睇劉醫師，都唔知再睇邊個中醫了，所以惟有繼續睇，過咗大半年到咗夏天，效果變得好好，所以比到信心我繼續睇。

我都唔記得當時睇劉醫師時，有沒有發多咗出來，不過就算有都唔多覺，因為當時我太厲害了，全身都係牛牛。我係飲東華煲的藥包，我覺得藥包效果較藥粉好，而且藥粉較燥。

如果有病友想睇中醫，但又唔知睇邊個好時，我會提議先睇劉醫師，如果無效再試其他中醫師。劉醫師對牛牛病較有經驗，而且對我來講，佢係我睇過所有的中醫，藥費最平，但最重要係效果最好。不過，討論區有病友睇咗劉醫師半年，都沒有成效，可見中醫並非可以夾到毎個病人。

 

cowcow 2008-07-12 01:43

你同jjen 都幾相似呢. 都係睇o左半年左右就開始變好.....我真係覺得你地好有耐性呢......比著我, 可能真係左試右試其他方法. 
我之前都睇晒討論區. 佢地真係試好多方法. 不過試完變差或者變好...通常講講下就冇晒下文....所以終究個種方法係好定係唔好.真係只有當時人至知.
睇o左咁耐討論區, 甚麼膚必清呀. smrp 呀. 恩德呀..都好似係唔一定得. 但費用又超貴....o岩o岩收到料知道一個病友食膚必清就o黎兩個月.初頭第一個月ok, 第二個月就發得好勁啦.
不過又有一個睇劉醫師, 頭兩個月冇乜o野, 第三個月開始, 又發o左好多出o黎. 夜瞓係牛牛病大忌呀.仲有皮膚乾燥都係對牛牛病唔好呢.唔好狂抓d皮膚, 會越o黎越嚴重o架(希望佢睇到我寫乜,雖然我已經係電話度講o左比佢知.)..
希望情況差o既病友. 點都好. 為o左穩定病情.都係早d瞓比較好. 但效果唔會即刻睇到o既..食中藥都係囉. 唔係一兩個月就會見效呀.
 係呢...我係食999藥粉的. 點樣為之燥呀??
-------------------------------------------------------------------------------------------

pp  2008-07-13 01:12

我之飲的藥粉是農本方，並非999藥粉。
我有時飲完藥粉，感覺上身體比較燥熱，我唔識點去形容。若果你無呢個感覺，你飲999藥粉應該無事。

cowcow 2008-07-13 01:20

最初飲999完全無乜感覺. 但最近飲就有少少肚痾咁. 上午飲一次就痾一次(唔嚴重的).  到6點左右飲一次, 又係痾一次...唔知點解會係咁呢??
jjen最初都好似係飲農本方的....

jxn-->牛皮癬-->東華劉漢長醫師--好番--已停藥4個月.

jjen  唔好意思, 我為o左方便其他牛牛blog友睇下醫好/醫緊o既情況資料.所以將你的留言抽出o黎.如果你覺得唔好. 請你通知我, 我再整走個網誌.

JJEN 2008-05-08 12:43

之前我都有呢個病, 舊年年尾好左, 但間唔中都會出一點兩點好似你而家的小牛, 我初時好驚係復發, 狂搽lotion, 好彩過幾個星期自動好左, 先放心 d‧希望你的小牛都好似我咁會自動消失‧

JJEN 2008-05-08 13:48

我係睇東華劉漢長醫師好番的(前後睇左一年), 而家已經停藥兩個月, 呢個病應該冇得斷尾, 所以成日好擔心復發‧我係牛皮癬討論區見到有d網友都係睇劉醫師, 但唔係個個都好得番, 真係要睇夾唔夾‧

JJEN 2008-05-08 14:29

我最嚴重時全身大約30-40%皮膚有牛牛, 最多係髮線, 額頭同"的水"o既位置, 背脊都好多, 當時好醜樣, 街都唔敢出‧睇劉醫師睇左四個月都冇進展, 想唔睇, 好彩劉醫師安慰我, 話中醫要比耐性, 要半年先見效, 我當時冇其他選擇, 唯有睇落去, 果然睇多一個月之後開始見效, 慢慢全部好番晒‧你都要比d信心比劉醫師, 中醫係將變差左o既體質慢慢調理番好, 所以要有耐性‧

JJEN 2008-05-08 22:14

我個病由06年尾開始發, 初時以為係普通皮膚病, 去睇私家醫生, 佢話係牛皮癬, 比藥我食(當時唔識問係咩藥), 但睇左兩次都覺得有藥食住就好, 唔食又發, 後來同朋友傾開, 佢地話睇中醫好d, 於是我07年3月中就開始睇劉醫師, 初時一星期覆診一次, 後來兩星期‧到11月全部好番晒, 但間中有紅點出, 所以重keep住食藥, 到08年3月好似冇咩紅點, 就停藥了‧

JJEN 2008-05-10 20:43

o個時塊面係有牛牛o架, 額頭髮線同"的水"位好勁o架, 連鼻冀同眉頭都紅紅一片, 好核突.

JJEN 2008-05-14 12:22

開始飲中藥啦? 記得覆診時將d中藥反應話比劉醫師知, 譬如飲完覺得攰, 順便睇埋大便o既"質地"同顏色, 佢會因應你o既反應再開過d藥.

JJEN 2008-05-14 22:52

要留意埋大便o既"質地"同顏色呀, 我o個時初初飲完o既反應冇咩野, 仲好好瞓, 大便軟左但顏色深左, 劉醫師話反應唔錯, 唔使轉藥.

 

JJEN 2008-05-19 17:40

我諗係因為你而家都冇咩牛牛, 所以劉醫師睇得咁快. 不過我個時都係大約3-4分鐘咋, 同埋佢都係冇咩答我野, 但態度好好, 一直保持微笑, 可能佢覺得中醫理論唔係三言兩語就可以解釋清楚比我地d, 講d唔講d又驚我地亂估, 所以唔答.

JJEN 2008-06-01 00:01

我之前post條頸o個張相, 係o係兩三日之間極速發出o黎o既(其他牛皮癬係慢慢咁發), 當時仲有右邊屁股都係差唔多情況, 覆診時劉醫師都話係敏感, 唔係牛皮癬, 我當時唔太相信, 邊有敏感係咁? 但唔信又可以點? 唯有繼續食藥. 但又真係好奇怪, 幾日之後d皮同紅色開始退, 唔使兩個星期條頸同屁股就好得七七八八, 而家諗翻轉頭, 又可能真係敏感都唔定喎, 如果唔係咁大面積o既牛皮癬又點會好得咁快? 其他部位都要五六個月至好轉啦.
正如夢幻騎士所講, 初次患者如果及時醫治, 處理得當, 好有機會根治, 劉醫師都講過類似o既話, 希望你都好快好翻同斷尾

JJEN 2008-06-01 17:55

你而家o既情況應該係繼續中西藥一齊食好d, 過幾個月時間等中藥o既調理作用開始發揮後, 在徵得肥醫生同劉醫師同意下, 開始減西藥至完全停晒西藥, 再睇下情況係點再決定下一步.
我當時條頸係睇劉醫師之後三個月發出o黎o既, 咁我又冇問佢因為咩敏感而起喎, 因為我當時真係唔信係敏感囉, 所以都唔在意佢講咩. 係呀當時我除左紅之外, 仲有勁甩皮, 我記得影o個張相o個兩日係我病發以來最唔開心o既日子, 因為好擔心繼續勁發同好唔翻, 日日以淚洗面, 喊到天昏地暗, 但d皮五日後就甩晒, 剩低紅色, 而d紅色十幾日就退晒.
既然劉醫師都話你o個d係敏感, 咁你就要相信佢(雖然我唔知個原理), 繼續搽番藥膏同keep住食藥.
係呀, 有d人睇劉醫師年幾兩年都唔得, 我睇一年就得, 真係好難講, 但始終都係o個句: 人人發病原因唔同, 體質又唔同, 唔一定個個都得, 但唔試過又點知? 反正佢d藥冇咩副作用, 試過唔得都冇損失.

JJEN 2008-06-17 18:14

劉醫師寫明食藥時間係上午7點 & 下午 5點呀, 我睇翻我以前d藥單, 佢又冇寫幾點食喎, 我以為隔四小時以上就得o既添.

 

cowcow 2008-06-17 21:02

係呀~ 我都想搵你, 問你當時點食藥o既. 你係幾點開始食o架??
如果你同我唔同, 我下次又問下劉醫師點解會有分別..

JJEN 2008-06-18 11:06

我係每日下午2:00同晚上9:00食o既, 因為藥單上寫"飯後服", 咁我早上通常唔食早餐, 咪唯有食完午飯同晚飯後食藥o羅.

cowcow 2008-06-18 13:47

咦~??我係飯前服呢..........原來個個都唔同........犀利...........睇o黎乜都差唔多o既劉醫師, 原來係有分別,有根據呢.............另眼相看.....^_^

JJEN 2008-06-18 16:55

上個禮拜日o係美孚撞翻一個以前o係東華候診室時傾過幾句o既病友, 記得當時係第二三次覆診, 食o左藥兩三個禮拜, 但個病一d好轉都冇, 本身對個病又認識唔多, 見隔離有個男病友頭頸面手都生晒牛皮癬, 就撩佢傾o左一陣, 佢大約40幾歲, 20幾歲就開始生牛皮癬, 以前睇西醫搽藥膏, 但一直冇好過, 仲越來越嚴重, 後來改睇中醫(劉醫師), 睇o左兩三個月度, 暫時冇乜進展, 我本來想問佢多d野, 但唔知佢係味驚個樣嚇親我(講真都幾嚇人吓), 好似好唔想再傾咁, 借d意走開o左, 後來覆診都見過一兩次, 再之後就冇再見過, 估唔到今次又無意撞翻佢, 當時佢見唔倒我, 睇佢個樣好似冇乜好轉, 唔知係佢冇繼續睇劉醫師, 定係一直有睇但冇好轉呢. 唉! 佢比呢個病折磨20幾年, 真係好慘...

cowcow 2008-06-18 22:58

其實我上次都有同你講, 真係好佩服你咁信劉醫師呢......一路睇都一發出o黎. 尤其是你頸後. 仲話係敏感, 比著我真係會失信心呢...... 我之前係牛牛討論區, 見到d"前輩" 睇幾個月就放棄, 你真係好堅持呢. 以你為榜樣~!!

有d前輩睇耐o左, 咩都試過, 有時會冇乜信心, 又或者真係個病耐o左係難斷尾都未定. 希望我都好似你咁斷到尾啦.

JJEN 2008-06-29 23:54

其實我都懷疑我o係10年前有過牛牛, o個時個頭有一撻地方成日有頭皮同好痕, 抓到損晒, 右耳後又有一撻地方好痕, 當時唔知係牛牛, 有求其睇過西醫但冇乜點理佢, 後來自己好翻. 照咁睇我今次好可能係翻發, 唔係初發...

 

cowcow 2008-06-30 00:11

我地兩個都可能係咁................

JJEN 2008-06-30 21:53

cowcow: 你真係犀利, 我o既故事你識背咁滯‧
IIXII: 我其實唔係好忍得口架咋, 只係發緊牛牛時唔敢食蝦蟹蛋牛鵝鴨同飲凍o野, 而家好翻就即刻狂食補翻數

 

JJEN 2008-06-30 22:09

記實我冇乜記性的. 所以都驚講錯. 上次牛牛聚會, 我都有講你個case 出o黎o架.
我係日本都食o左2小隻作蝦.....哈哈. 感覺麻麻地.....好彩冇發.
你依家記住keep得好好地呀~