第三次覆診~唔洗除褲啦~~哈哈

2008年3月31號星期一陰天有微雨

2點幾返到屋企沖完涼至去覆診, 因為朝早行到身水身汗. 廢事嗅賓賓去覆診.
3點就去到. 先睇下個2號房門係咪貼o左醫生個名, 因為離得遠得滯, 好似係,又好似唔係,不過因為我離遠見到醫生個名第二個字都幾少筆劃,所以都隱隱覺得係肥醫生.點都好都要睇o架啦. 後尾登記完,就睇得好清楚醫生個名啦.（安心しました）好快就有得睇,3點25分就入得去睇.
肥醫生望都唔望我. :你叫咩名呀?
嘩~差d唔識答佢, 我叫...(都仲未講,醫生就認得我).
哦, 原來係你呀? 點呀? 你個biopsy報告真係牛皮癬喎. (同上次葉醫生o既答案真係差得遠),
我話係呀~ (都冇失望o既.)
今次準備o左件長衫去覆診,斷估點除褲都唔會引起尷尬. 不過醫生今次唔睇背脊,又唔睇我對豬腿啦.係睇我對腳板,好彩我沖完涼都換o左對新襪先去見佢.因為我話佢知3月3號開始減藥之後,2隻腳板甩晒皮.跟住我再問佢,我手上o既紅點係乜. 佢話都會有o架. (其實係咪冇答到我呢?) 跟住我又問佢有牛皮癬會唔會同時有濕疹, 佢話唔會, 咁我就攞我準備o左o既2張相比醫生睇.,(係我3月中唔開心個日,2隻手生o左d 粒粒.咪影低佢)咁佢睇完就話相個d係濕疹,咁即係點??跟住講o左其他,就不了了知,(其實我成日都比醫生講下講下講o左去第二度,跟住就唔記得再問清楚 >_<),
因為我係2月寫o左2封信比醫生,講下自己o既o野, 所以今次醫生最初問我瞓唔瞓得著,我話瞓到啦~依家住係邊呀? 亞媽度, 哦~咁咪好囉,醫生叫我開心d,過去o左就過去. 睇開d呀~我同佢講,其實我不嬲都咁開心, 肥醫生話: 咁咪好囉, 睇見你都開心o左.
肥醫生, 其實不嬲我個人係好睇得開o既.唔開心o既o野我通常都唔會記住. 只係今次鬱o左3個月就攪成咁. 有o左牛牛呢個病,冇得後悔.我亦唔會後悔.有d o野係整定o既,隨遇而安啦. (呢一段我冇同醫生講, 不過我今晚會寫多一封信比醫生)
講番覆診, 肥醫生話我上次比QE本相簿, 有用喎, D醫生學生睇o黎睇去. 咁就好啦. 不過我覺得稍為寫得少o左o野. 相都唔夠多, 因為之前真係冇諗過會整相簿o既. 仲成日比亞媽鬧我影咁多d牛牛相做乜??
今次又減藥啦~~ 哈哈 (亞Q, 明知停晒藥就會生番d牛牛出o黎)
由20mg 減到15mg
咁一粒(膠囊)neotigason係10mg, 點食呢?? 肥醫生話第一日食1粒 10mg, 第二日就食 2粒 10mg,我就同醫生講, 屎啦, 我實食錯藥.(正話醫生都有叫我準時食藥,因為上次封信, 我話比佢知, 我係北京唔記得食一日藥就生o左一粒牛牛出o黎)
醫生教我一個好好方法, (醫生即係醫生)個日期係單數, 咁就食一粒10mg, 雙數個日就食2粒  2x10mg ,佢即刻考我. 今日31號, 即係食幾多粒呀?? 我諗一諗, 1粒.  咁8號呢?? 我又諗(淺得滯驚答錯)2粒,  咁4月31號呢??  1粒.........o車~4月都冇31號. 第屎得醫生. 咁玩我. (嗱, 呢個肥醫生係咪幾好呀?? 邊度似睇緊病o者 ^_^) 真係睇肥醫生都開心d, 又安心d.
上次3月3號佢請2日假就比我中o左見唔到佢.唔怪之得牛皮癬都比我中o左啦~~ 不過講笑還講笑, 牛皮癬關節炎就千祈唔好比我中.
今次記得帶番件北京手信比肥醫生, 係個筆筒o黎o既, 唔知佢用唔用得著呢?
肥醫生今日好似有d唔開心, 因為唔見佢嘻哈大笑. 不過佢個句口頭禪又出動啦~
"你明唔明白呀?"
^_^
4月28號覆診

皮膚近況照片(食緊neotigasom 20mg) 唔開心影響皮膚

3月31號比相醫生睇, 佢話係濕診
唔記得問清楚醫生. 係唔係如果皮膚上有牛皮癬就唔會有濕疹.
但好似我食緊西藥neotigason , d皮膚冇牛皮癬o既話, 就會生濕疹?

今天天氣真好.

2008年3月17日星期一
今朝發覺我尋日冇食藥 @_@
出o左院第46日o既今天, 終於完成留院24天o既日誌~
唔可以話係懷念個段日子. 但係醫院24日, 對入面清楚好多, d姑娘呀, 護士呀,醫生呀,掃地亞嬸等等. 仲有不同o既病人, 病人家屬o既面孔.
睇見d婆婆有時都覺得好慘, 有d係冇人照顧由安老院轉送入醫院o既.有d係有家人探訪o既. 其中有3個婆婆比較有d印像.
瞓係我隔離o既72歲婆婆. 個次佢好大聲同我講, "求下你, 比d水我飲" 佢個句"求下你"婆婆把聲一直都留係我腦海中, 實在太震撼.............. 只不過想飲一啖水. 一個咁簡單o既要求.冇人理佢. 好多姑娘護士行過聽到都冇理佢. 自始,  我就負起比水佢飲o既責任(自己攞o黎o既,唔關人事, 佢冇禁水牌時我比佢飲) 正如佢個仔同我講, 佢媽媽真係好堅強.睇婆婆係好辛苦咁捱落去. 佢兩個仔一個女, 仲有2個新抱, 每日都o黎照顧婆婆.尤其是佢個大仔.日又o黎, 夜又o黎. 認真孝順.........當然每個做人子女o既, 都唔想:子欲養而親不在.
最後我出院個日, 我都講o左自己o野比佢個大仔知. 傾o左好耐.佢以前係和記高層.

係醫院住o左咁多日, 都冇見過一個身邊o既人過身. 係我臨出院前2天, 就比我見到.都係幾震撼.
一個叫盧三o既婆婆. 佢身型好廋,好細粒. 成日都係坐係床到用力吸氣. 有個深藍色衫o既姑娘好好, 成日都好好聲叫盧婆婆做, 亞三, 你今日點呀?? 亞三, 你真係好乖呀.盧婆婆每次食o野都要裝番副假牙. 我都曾經幫佢打開個盒攞副牙出o黎.佢好有尊嚴.佢要自己去廁所(用尿兜),就算d姑娘叫佢改用尿片, 佢都唔聽. 每次都係用尿兜.有一朝食早餐時間, (我仲瞓係床上),我聽到工作人員叫:盧三食早餐啦, 不過冇人應佢.後來有個姑娘就講: 佢走鬼o左啦.我至起身睇下佢. 好安詳咁瞓o左係床上面.等佢o既屋企人見完最後一面, 就將婆婆裝落去個鐵箱度運走.
另一個婆婆我唔知佢叫咩名, 成個星期前已經見到佢成日揸住把扇係咁潑.覺得佢冇乜病,點知係我出院前2日朝早. 佢又係咁叫人比水佢飲, 仲成日自己偷偷飲.(其實佢有牌寫住禁水) 後來見到個女主診醫生同佢講: 婆婆你唔好再飲水啦, 如果唔係你會死o架. 講完冇幾耐, 下午就見婆婆呼吸困難昏睡,過了2日便過身.....
真係~明明係生勾勾, 話咁快就一去不回頭.做人真係幾化.........

第二次覆診~ 仲瘀

2008年3月3日星期一
第二次覆診
仲以為等o左4個星期終於可以見到肥醫生. 仲帶埋件北京手信比佢.點知唔知點解唔係佢, 係另一個比肥醫生靚仔(雖然淨係睇到佢對眼),比肥醫生瘦o既葉醫生. 做乜鬼唔返工呀?? 小炳肥醫生.
問葉醫生肥醫生放假呀? 佢就九唔搭八咁答我, 我幫你睇都一樣o既....  嘩~點同呀, 你又唔知頭唔知路. 我d牛皮癬生成點你都唔知啦, (我心諗) 我問佢, 好似有biopsy報告, 佢話係呀, 我問佢, 咁係咪証實係牛皮癬呀? 佢睇睇份雞腸報告. 話份報告唔會肯定話明係牛皮癬, 報告講係話我個d係無菌o既膿, 呢樣o野我留醫o既時候已經知道啦.仲洗等呢份biopsy報告咩~等6個星期比個咁o既答案我. 肥醫生, 你做乜唔返工呀??小小炳.
葉醫生仲話我食neotigason食得咁好, 唔好比佢停. 唉~佢知唔知neotigason有咩副作用o架??佢話依家食o既份量算係好低,屬於外國人o既細路仔份量喎....有機會, 我都想生番舊义燒o架.我問佢, 長時間食會有咩副作用呀?? 佢話,食10年8載會生下骨剌咁啦~ 吓? 咁即係點?? 就係咁簡單~??   又要等31號問下肥醫生.
上次除褲咁瘀, 今次特登著條連身Q裙去覆診, 諗住就咁拿起條裙比醫生睇隻豬腿,點知葉醫生都係想睇下其他事旦一忽肉.唉~迫於無奈係後面拿起條連身Q裙比佢睇.瘀到爆.
最衰都係肥醫生冇返. 希望下次佢會係度啦~ 小小小炳
發覺肥醫生睇病唔會戴口罩, 又唔會用雪條棍hi我d皮.但今次葉醫生就會, 好似驚我傳染d病比佢咁,牛皮癬唔會傳染o架!!咁驚死, 點做醫生呀?? .
neotigason 由25mg 減到 20mg 


3月31號第三次覆診.