超透支~ part one

今日好繁忙呀~ 7點幾起身去東華覆診......
因為臨時約o左朋友10:30去行山頂, 所以一定要準時9:00去到東華.
起身就見到尋晚朋友打比我. 不過驚太早嘈醒朋友, 所以冇覆就出門口.
(原來朋友今朝特登早起去中環, 想帶我去食正正早餐, 可惜我今朝冇即刻覆朋友,
到朋友搭緊地鐵打比我時, 我已經差不多同行山朋友會合了, 所以辜負了朋友一番
好意.係呢度再同呢位朋友講多一聲. 唔好意思~ )

去到東華得一個病人. 好快就入去見劉醫師, 我入去先. 打完脈睇完脷劉醫師話我好o左喎. 我再提佢我停o左西藥, 佢就同學生講, 係西醫角度, 我叫做好番喎.不過依家食d中藥, 攪番好d身體, 再提我少飲凍o野....其實我真係比以前少飲好多啦.
我係登記時, 已經問o左劉醫師幾時有位,,,,,,,,嘩~! 居然排到去2月28號....今日先至係12月27號咋...
劉醫師話比4個星期藥我,,,,我話: 吓~ 劉醫師, 要排到2月28號至有位覆診呀...劉醫師初頭話唔緊要, 停下藥都ok,,,,, 我又提佢: 唔係喎,,,,係2月28號喎,,,,,佢至清醒. 原來佢以為2月中就有位, 我停2星期都唔係大問題, 後來至知係停4個星期, 佢至話: 哦~ 唔得啦. 隔咁耐有d危險, 都係開8星期藥比你啦.... >_<
劉醫師提我: 做多d運動, 唔好比自己感冒.(感冒會引發牛牛走出o黎o架)
跟住到老媽
佢又話老媽好o左. (咁事實都好似係好o左d o既) 叫老媽繼續要一邊搽藥膏, 一邊飲中藥. 會快d好, 仲識同老媽講keep住搽. 因為就過年, 老媽可能會去坪州拜神做事, 有幾日唔係屋企, 所以問劉醫師食沖劑好唔好, 初頭劉醫師話自己煲藥好D, 不過見老媽可能唔係太嚴重掛? 開o左2條藥方, 4星期煲藥, 4星期飲沖劑,,,,,不過估唔到條農本方藥方同我個條一模一樣o既.

2個人睇, 8個星期藥,,,,,今日又大吐血.......一共比o左 4,620大圓~ @_@
依家終於明白, 以前有個病友話過我, 唔做o野邊度得. 唔洗搵錢睇醫生呀...
唉~ 明白晒...........
醒起藥單冇寫幾點食藥, 拍門再問劉醫師, 我問佢第一劑一早飲, 定係中午飲, 最後一劑係咪晚飯飲. 點知劉醫師答我: 最好係一早飲同中午飲,,,,,,,,我問: 咁夜晚飲得唔得, 佢話儘量唔好夜晚飲中藥喎.....明白, 其實除非我冇帶藥粉, 如果唔係我好多時都係5點多就會飲埋最後一劑.

今日好衰女, 約o左朋友行山, 又冇諗過一次攞2個月的藥, 所以攞到老媽擹擹腰.
已經帶定背囊去....點知都係裝唔晒.

同老媽行完一段最接近地鐵的路之後.....就bye bye啦.... 個心擔心老媽頂唔順...但又要影一張衰女相.

4個朋友 + 姪女  共6個人由中環行上山頂........嘩~ 呢條邊係行山路徑, 超斜!!

今日唔算熱, 但行到抽晒筋~

仲有2個墜後緊.

雖然超斜, 但唔洗一個鐘就上到山頂. (落山就30分鐘左右到動植物公園)

估唔到上到山頂之後o既節目係飲茶........
飲完茶同朋友分道揚標, 佢地行第2條路落山.
 (聽講因為有少少迷路,所以行o左成3個鐘)
我就同姪女因為要去赤柱,,,,所以行番原路落山

繁忙的一日

今日上午帶老媽去東華, 今次係老媽帶路(因為我要試下佢認唔認得條路), 佢好醒, 唔用上次的A出口, 因為老媽熟B出口,所以今日係B出口出, 佢認得上環熟食中心, 所以佢今日行得好快. 行到花檔離遠已經望到東華三院個標誌. 我同老媽講, 個女醒目, 亞媽都蠢唔晒, 老媽即反駁: 個亞媽醒, d女至唔係豬.,,,,,ok 証明老媽反應敏捷,思路清析.下次唔洗陪佢睇劉醫師都冇問題.
老媽同劉醫師講飲o左d中藥, 大便都多o左, 好舒服, 劉醫師聽到都笑. 叫老媽今次攞2星期藥. ok 冇問題. 12月27號覆診

老媽話我"請"佢睇醫生, 佢請我食o野喎...... mos burger
老媽本來鍾意食麥記的魚柳飽, 自從我上次請佢食過一次mos burger的
白鱈魚漢堡之後.....老媽就學人玩移情別戀.....呵呵呵. 唔關我事.

大啖大啖食.

食到鬼咁開心, 叫老媽笑住影相都有求必應.

食飽飽返家就準備下午去油麻地覆診. 真係繁忙....
4點至去到. 冇乜人, 但唔知點解要等好鬼耐. 終於見醫生啦. 林醫生先睇下我個頭皮, 再睇下我塊樣衰面.(食得蝦多啦實係..所以咀邊紅到一撻撻)
呢張相係打完邊爐個晚的衰樣 07/12  03:23

呢張係今晚衰樣, 好番好多(只係搽cream). 食咁多蝦,,,,第屎.

不過林醫生用放大鏡睇過我塊面, 話只係敏感, 唔係牛牛喎.
仲問我不如停藥啦..... (我想講比醫生知上個月已經停o左藥)
我本來諗住攞埋今次至停攞(neotigason), 不過後來就冇lu, 問醫生如果我停藥, 咁要隔幾耐至可以覆診呀.....因為驚突然變豬頭都冇藥解救. 咁林醫生就話:::::::::::>8個星期覆診啦. 不過你其實食10mg 食o左咁耐都冇生過牛牛出o黎. 我(林醫生)就唔係咁驚o既.
(希望如醫生所講啦)
**記錄: 1月8號~ 25mg 食o左2個星期
               3月號~ 20mg 食o左4個星期
               4月1號~7月28號  15mg
               7月29號~ 11月2日 10mg
             
我今日好似點菜咁: 林醫生, 我想要silkis, 我想要頭皮水,但想要冇類固醇o既. 仲想要一支洗頭水tim. 仲有止痕藥....係係係. 咁我塊面敏感, 洗唔洗搽藥膏?? 啊~搽cream就得啦????? OK明白.  唔該晒林醫生.
攞o左唔係好多藥, 但都係有用o既. 不過AQ就冇乜用啦. 等下次blog友IIIXIII可以DIY 保濕CREAM啦. SILKIS 比JENJEN, DAIVONEX 呢隻頭皮水, 原來只係UNCLE TOM比個支細一半的.
問過UNCLE TOM, 政府個支洗頭水+精油都OK可以用,所以用完T/GEL支洗頭水都有著落啦. 唔洗驚冇貨. (不過冇貨都可以用茶籽粉o既)

8個星期就係年初八, 年初八覆診,,,,唉,,,真係唔想,,,
放完新年第一日返工就覆診....... 真係大吉.
百無禁忌....百無禁忌
但出年屬羊好似係犯太歲~ 叫老媽做做手腳至得.

濕疹+牛牛

2008年12月4號 星期四 天晴
老媽第一次睇劉醫師, 本來約o左10:30, 不過我又改埋今日睇. (9:00) 所以今朝晨咁早起身,因為老媽行得比較慢, 我要預一個鐘出門口, 平時係35分鐘就到東華.
我先睇, 劉醫師睇我條脷話我好o左.我話佢知我停o左西藥一個月. 佢好似幾開心咁(不過我之後諗番轉頭. 我唔記得話佢知, 唔係醫生叫我停, 係我自己停) 再比小腿劉醫師睇, 佢話唔係牛牛. 又話我條頸痕唔關牛牛事. 不過叫我千祈唔好R喎. 忍得痕我就一定唔R囉, 但唔忍得就要食止痕藥.
今次終於換藥啦. 改為飲農本方. 唔記得問劉醫師有咩好tim.
不過我知道飲藥會方便過999藥粉. 唔洗沖一次要分兩次飲, 農本方就一日兩次, 每次3包.

劉醫師知道我今日帶埋老媽o黎, 所以將老媽提前睇症. 真係好人, 唔洗老媽等一個鐘.
劉醫師最初睇老媽的皮膚時, 話老媽個d唔係牛牛, 係濕疹.

老媽今日狀況如下:

仲有大腿後面都有好多印, 不過冇影相. 但劉醫師望過下. 佢就話唔係牛皮癬.(我冇影相呀. 影老媽pat pat, 殺o左我都似.)
(上一次我形容老媽大腿後面的牛牛情況比一個病友的媽媽聽, 佢都話:聽我形容就唔多似牛牛,反而似濕疹多d. )
直至劉醫師睇到老媽呢一粒牛牛. 佢就話呢粒係牛牛.(因為表面有皮屑)
咁即係點?? 佢話可能濕疹慢慢變牛牛喎, 又話老媽有糖尿病, 都會影響d皮膚.叫老媽有心理準備要飲中藥一段時間.
老媽最初聽到係濕疹都幾開心o架. 仲話比劉醫師知: 係個女成日話我牛皮癬之嘛~
如果唔係牛牛緊係好啦. 拜得神落啦. 傻媽~!

劉醫師叫老媽煲藥會好d.
所以比o左呢d藥老媽自己煲, 試3日, 8號10:30 再覆診.
8號要老媽一個人去東華, 唔知佢認唔認得路, 聽唔聽到劉醫師的半鹹淡廣東話呢??

劉醫師12月15號開始放假, 但又唔知放到幾時, 不過就逢星期六會出現睇症喎.各位病友要留意啦.


今日睇一睇, 老媽3日藥要  100 + 40 = 140 (優惠20蚊登記費, 此優惠到今年底)
我轉農本方, 先試7日藥  120 + 240 = 360
嘩~ 一個月連埋老媽, 中醫就要成2600幾啦....最少......    各兄弟家姐, 見字請聯絡我. 有要事商量.

東華驗血報告

今日去o左東華覆診. 上次驗血報告出o左
劉醫師話報告好好.但我冇問佢份報告咩意思. 事鬼但, 知道冇問題便算lu.

劉醫師都係冇乜o野講, 打脈睇脷, 但我條脷還是黑黑的. 問佢係咪唔洗轉藥,劉醫師話係, d藥都係用o黎調理身體免疫能力喎. 我同佢講, 我都好乖, 冇乜飲凍o野同食雪糕, 佢話調理身體唔係一朝一夕.........我都知o既...
見到佢張覆診病人紙內, 有老媽個名, 我同醫師講: (指住老媽個名, )呢個係我亞媽, 佢都有牛牛病啦, 但佢唔肯o黎睇, 劉醫師聽到我講就話: 快d帶佢o黎睇,早d睇快d醫好. 唔好等到佢生多. ......我都知啦...不過老媽唔肯同我o黎之嘛...
劉醫師話佢d牛牛病人, 細至7歲, 老至80歲都有人發病喎, 真係慘~ 80歲都要生牛牛.....
今晚再同老媽講番劉醫師d說話, 佢又冇反抗喎.所以星期一又要再同老媽book過劉醫師..

又唔見1200蚊..


食o左3個月的中藥明細~   12月13號覆診~!!

5月29號星期五

2008年10月14日 星期二  天晴

2009年5月29號星期五, 端午節假期後的第二天

知唔知咩日子?? 你地R爆頭都唔會諗到o既.

09年新日曆上第一樣要記低的事項.

就係老媽係油麻地皮膚科第一次睇醫生的日子.

嚇o左一跳 老媽尋日去排期,

居然排到去09年的5月29號.

到時老媽D牛牛唔知會變成點呢?

老媽問我點解年初我會咁快有得睇,我答老媽:

緊係啦. 留醫20幾日, 唔通仲要等大半年至有得覆診呀?? 傻o既.

老媽再話: 到時自己冇晒牛牛, 唔知醫生仲會唔會睇佢個病

(哈~!老媽一d都唔擔心會發到豬頭咁, 又或者唔知呢個係長期鬥爭的開始.)

要老媽面對呢個牛牛病都唔係咁麻煩.

佢好快就已經接受現實

二嫂早兩日同我講

亞媽好似唔多想比人知有呢個病

我同二嫂講: 吓~緊係要比人知啦.

老媽唔講,我同佢講tim 呀~! 怕甚麼??!!

如果佢自己都接受唔到呢個病,

其他人就更加接受唔到啦.

接受到呢個病, 就要用呢個病的治療方法去醫.

冇得斷尾都係事實, 但真係要有心理準備呀~!

不過我覺得老媽真係叻叻. 佢呢幾日已經識得搽aq & 藥膏啦.

72歲的老媽, 要頒個獎比你lu

倒水咁倒!

2008年10月11日 星期六  天晴 

今日10點幾又要去東華覆診, 早o左成個鐘去, 好彩都可以早睇.

先去評估室量血壓. 姑娘話非常正常.(好似係109/69)

冇幾耐就可以入去見醫師. 打脈又打得快, 冇乜o野同我講, 淨係話好好, 好好.

因為已經食o左中藥差不多5個幾月, 所以劉醫師叫我抽血驗肝, 原來要比250蚊. 睇西醫政府就唔洗收錢.

(公司有得claim個d就唔洗錢, 中醫要比錢但公司又冇得claim, 真係慘,

都係叫公司轉下醫療plan至得.)

劉醫師話比2星期藥我, 我話之前係4個禮拜o架, 咁佢又改為4星期覆診,

不過就算佢話2星期後覆診都BOOK唔到啦.

4星期藥 + 診金   已經1200蚊, 再加驗血 $250. 今日唔洗2個鐘就洗o左1450蚊. 真係以後冇人請都唔知去邊樹搵錢o黎睇醫生. >_<

交1080蚊時, 東華個位高大瘦亞叔(次次見佢都無表情,又不至於無禮貌), 找錢時找多o左900蚊比我. (我比1100, 應該找20蚊比我) , 我擰一擰轉面,見櫃台有920蚊咁多, 我就叫o左出o黎: 嘩~乜咁多錢呀??   高大瘦亞叔就望一望未有反應, 後面兩個執藥員可能以為有錢執. 走埋o黎睇下發生咩事. 我話我好似比1100蚊你喎, 咁高大瘦亞叔望一望個錢櫃, 拿住1100蚊睇一睇, 再係櫃台攞番900蚊走. 但係面上都係無表情, 當然連一聲: " 唔該" 都冇啦.

咁我都冇後悔提醒佢o既. 事實上找多o左錢比人, 要自己貼番出o黎真係幾傷o既, 我地開舖o既, 有時找多錢比人, 對方又唔出聲, 事後我地至醒覺就太遲了. 當然有時d客係唔知我地找多錢o既.

依家除非係地下執到錢又唔知邊個係物主啦. 如果係人地找多錢,就一定出聲囉. 尤其是打工個d呀~ 找錯一次錢, 做一日都唔夠嘔番出o黎. 所以記住唔好貪心呀~ 

(最近成日都有人找多錢比我, 上次去台灣都有人找多錢)

11月8號覆診, 尋日帶老媽去睇西醫時, 都唔醒起帶老媽去東華, 今日醒起, 就預約埋老媽一齊睇劉醫師, 希望老媽可以好似jenjen咁好番唔洗睇醫生就好啦.

嘩~ 又要洗多一倍錢啦~

做人真係要苦中作樂o既, 去東華途中, 唔知點解有好多麵包店, 但我覺得呢間o既硬豬仔包好正, 好鬼脆. (但我唔覺熱氣呀~) 老闆娘話日日都係11點幾就會出爐喎, $3.5一個. 你地行開就買一個o黎試下啦.真係幾正o架.

最近家姐幫我買o左d乜鬼蘆薈汁, 鬼咁貴, 成250蚊一樽. 去台灣4日就比我飲晒一樽, 唔知有咩好. 又幫我多買3樽, 咁又唔見o左1000大洋.

henry, 唔該幫我睇睇, 佢話美國製造喎.(又係直銷o野. big pig最興)

http://www.markethongkong.com.hk

今晚11點幾返到屋企, big pig佢地又燒緊o野食.

我只係做下樣影張相o者. 不過都有食一隻雞翼 & 一件豬扒咁多多.

熙熙高大o左好多啦.

Henry Henry, 特別報告~ 亞娟出年2月28號結婚啦. 瑞姐千叮萬囑我通知你, 叫你儘量配合返o黎飲喎, 你自己計劃下啦~ 唔好話我冇通知你呀~!